Prezident İlham Əliyev Bakının Lökbatan qəsəbəsində Heydər Parkının,
Heydər Əliyev Mərkəzinin və "Cırtdan” uşaq əyləncə parkının
açılışlarında iştirak etmişdir.
Mərasim iştirakçıları dövlət başçısını hərarətlə qarşıladılar.
Prezident İlham Əliyevə Lökbatan qəsəbəsinin mərkəzində yerləşən Heydər
Parkında aparılmış əsaslı yenidənqurma və abadlıq işləri barədə məlumat
verildi. Bildirildi ki, ölkənin ən böyük sənaye mərkəzlərindən olan
Qaradağ rayonunun inkişafı dövlətimizin başçısının daim diqqət
mərkəzindədir. Qaradağ rayonunun inkişafı ilə bağlı böyük tədbirlər
həyata keçirilir, əhalinin sosial problemlərinin həlli istiqamətində
mühüm addımlar atılır.
Diqqətə çatdırıldı ki, Heydər Parkının ərazisi əsaslı yenidənqurma
işləri nəticəsində xeyli genişləndirilmiş, burada qəsəbə sakinlərinin
mənalı istirahəti üçün hər cür şərait yaradılmışdır. Prezident İlham
Əliyevin Bakı şəhərində park və xiyabanların əsaslı təmiri və yenidən
qurulması ilə bağlı tapşırıqlarına uyğun olaraq inşa edilmiş parkda yeni
yaşıllıq zolaqları salınmış, müasir işıqlandırma sistemi və oturacaqlar
quraşdırılmış, yaraşıqlı fəvvarələr tikilmişdir.
Bildirildi ki, müasir müstəqil Azərbaycan dövlətinin memarı və
qurucusu, xalqımızın ümummilli lideri Heydər Əliyevin zəngin siyasi
irsinin öyrənilməsi və təbliği məqsədilə parkın ərazisində Heydər Əliyev
Mərkəzi inşa edilmişdir.
Dövlət başçısı ulu öndər Heydər Əliyevin parkda ucaldılmış abidəsini ziyarət etdi, önünə gül dəstəsi qoydu.
Prezident İlham Əliyev Qaradağ rayon ictimaiyyətinin nümayəndələri ilə görüşdü, onları təbrik edərək dedi:
- Sizi Heydər Əliyev Mərkəzinin açılışı münasibətilə ürəkdən təbrik
edirəm. Bu, çox gözəl mərkəzdir. Biz bu mərkəzin açılışında da bərabər
iştirak edirik. Mərkəz həm Qaradağ rayonuna, onun mərkəzi olan Lökbatan
qəsəbəsinə əlavə yaraşıq verir, həm də funksional baxımdan çox
dəyərlidir. Bütövlükdə burada gedən işlər məni çox sevindirir. Əminəm
ki, siz də mənim fikrimlə razılaşırsınız. Qəsəbənin sakinləri burada
gedən gözəl dəyişiklikləri görürlər və bu dəyişikliklərin həyata
keçirilməsində fəal iştirak edirlər. İndi bu park demək olar ki, Bakının
ən gözəl parklarından biridir. Gözəl şərait yaradılıb, abadlıq işləri
görülüb. Parkdan başqa, bütün bu binalar təmir olunub, küçələr salınıb,
genişləndirilib. Yəni, burada gedən abadlıq-quruculuq işləri onu
göstərir ki, iradə, istək və işgüzarlıq olan yerdə hər şeyi etmək
mümkündür.
Mən çox şadam ki, son dövrlərdə Qaradağ rayonunda belə gözəl işlər
görülmüşdür, özü də, qısa müddət ərzində. Bilirsiniz ki, Qaradağ
rayonuna mənim həmişə xüsusi münasibətim, xüsusi diqqətim olub. Mənim
demək olar ki, siyasi fəaliyyətim bu rayonda başlayıb. Birinci dəfə
1995-ci ildə qaradağlılar mənə etimad göstərmiş, Milli Məclisə deputat
seçmişlər. Mən də çalışırdım ki, bu böyük etimadı doğruldum. Dəfələrlə
Qaradağ rayonuna gəlmişəm, vəziyyətlə tanış olmuşam. Bu gün ölkə
Prezidenti kimi çalışıram ki, Bakının ən böyük rayonu olan Qaradağ
rayonunun inkişafı üçün öz köməyimi göstərim.
Rayonun iqtisadi və sənaye inkişafı sürətli gedir. Qaradağ rayonu
Azərbaycanın güclü sənaye mərkəzinə çevrilir. Burada yaradılan
müəssisələr və tikilməkdə olan zavodlar rayonun iqtisadi gücünü
artıracaq, yeni iş yerlərinin açılmasına gətirib çıxaracaqdır.
Bir müddət bundan əvvəl xarici investorlar tərəfindən tikilən böyük
sement zavodunun təməl daşını qoyduq. Yəqin ki, gələn il bu zavod
fəaliyyətə başlayacaqdır. Ondan sonra Qaradağ rayonunda ölkəmiz üçün çox
böyük əhəmiyyətə malik olan gəmiqayırma zavodunun təməl daşı qoyuldu.
Keçən il Bakının yeni ticarət limanı yenə də Qaradağda tikilməyə
başlanmışdır.
Əlbəttə, Qaradağ rayonunun ərazisi çox böyükdür. Ərazi baxımından
Bakının yarısı qədərdir. Coğrafi vəziyyəti belədir ki, buranı böyük
sənaye mərkəzinə çevirmək üçün yaxşı imkanlar vardır. Ancaq digər
tərəfdən, o da həqiqətdir ki, Qaradağ rayonunun ölkəmizin sənaye
potensialının inkişafında öz rolu olmalıdır. Ölkəmizdə indi çox güclü
sənayeləşmə siyasəti aparılır. Biz müxtəlif istiqamətlərdə güclü sənaye
potensialının yaradılması ilə məşğuluq. Hazırda biz ölkə miqyasında
əlbəttə ki, Bakıdan sonra iki böyük sənaye mərkəzinin yaradılması ilə
ciddi məşğuluq. Onlardan biri neft-kimya sənayesinin ənənəvi mərkəzi
olan Sumqayıt şəhəridir. Hazırda bu ənənəvi sahə ilə bərabər Sumqayıtda
çox güclü sənaye potensialı yaradılır. İkinci sənaye mərkəzi Qaradağ
rayonu olmalıdır. Gələcəkdə Qaradağ rayonunda böyük neft-kimya
kompleksinin yaradılması da planlarımızda vardır.
Rayonun bu sürətli inkişafını nəzərə alaraq, hələ bir neçə il bundan
əvvəl mənim təşəbbüsümlə Qaradağ rayonunda böyük elektrik stansiyası
tikilib istifadəyə verilmişdir. Modul tipli Səngəçal elektrik
stansiyasının istehsal gücü 300 meqavata bərabərdir. Yəni, bu, gələcəyə
atılmış bir addımdır. Çünki biz bilirdik ki, burada yaradılacaq yeni
sənaye müəssisələri əlavə elektrik enerjisi tələb edəcəkdir. Biz hər
şeyi planlı şəkildə edirik və yenə də demək istəyirəm ki, sənaye
sahəsində görülən bütün bu işlərlə bərabər, rayonda qısa müddət ərzində
belə gözəl abadlıq işlərinin aparılması məni çox sevindirir. Mən
istəyirəm ki, bütün şəhərlərimiz, bütün meydanlarımız belə gözəl olsun,
insanlar üçün gözəl şərait yaradılsın, Azərbaycan vətəndaşları rahat
yaşasınlar. Biz bu meydandan bu yaxınlarda istifadəyə verilmiş gözəl evi
də görürük. Şəhid ailələri, Qarabağ müharibəsi əlilləri üçün tikilmiş
gözəl bina da bu meydana əlavə yaraşıq verir.
Həm iqtisadi, həm də sosial məsələlərin həlli daim diqqət
mərkəzindədir. 2011-ci ili biz böyük ümidlərlə başlayırıq. 2011-ci ildə
mənim ilk belə görüşüm Qaradağ rayonundadır. Keçən ildə də, əvvəlki
illərdə də dəfələrlə rayonda olmuşam, gələcəkdə də gələcəyəm, çünki
burada hələ açılışlar çox olacaqdır.
Sizi görülən bu işlərlə, əldə edilmiş uğurlarla ürəkdən təbrik edirəm. Sağ olun
Lökbatan qəsəbəsinin sakinləri adından dövlət başçısı İlham Əliyevə minnətdarlığını bildirən Təranə İsmayılova dedi:
- Hörmətli möhtərəm cənab Prezident!
Sizi - ulu öndər Heydər Əliyevin layiqli davamçısını, ölkəmizi dünya
miqyasında tanıdan görkəmli rəhbərimizi Sizin üçün həmişə doğma və əziz
olan Qaradağ rayonunda səmimi qəlbdən salamlayıram və bütün rayon
ictimaiyyəti adından Sizə "Xoş gəlmisiniz!” deyirəm.
Biz həmişə fəxr etmişik ki, Siz böyük siyasətə məhz Qaradağ rayonundan
başlamısınız. 1995-2000-ci illərdə Siz parlamentdə bizim rayonun
deputatı olmusunuz və o zaman da bizim rayon üçün çox böyük işlər
görmüsünüz. Sizin təşəbbüsünüzlə yaradılmış Qaradağ rayonunun
Sosial-İqtisadi İnkişafına Yardım Fondunun köməyi ilə rayonda bir çox
işlər görülmüşdür. Bu işlər bu gün də davam edir. Fond bütün əlamətdar
günlərdə, bayramlarda rayonun ən çox sosial müdafiəyə ehtiyacı olan
təbəqələrinə maddi kömək göstərir, bayram sovqatları paylayır. Biz
fəxrlə bildiririk ki, ölkəmizin bütün bölgələrində inşa olunan olimpiya
idman komplekslərinin, şəhid və əlil ailələri üçün çoxmərtəbəli yaşayış
binalarının birincisi məhz Lökbatan qəsəbəsində tikilmişdir. Bu
obyektlərin açılışında ümummilli liderimiz Heydər Əliyev şəxsən iştirak
etmiş və öz xeyir-duasını vermişdir.
Möhtərəm cənab Prezident!
Sizin Qaradağ rayonuna qayğınız bu gün də davam edir. Qaradağda Sizin
təşəbbüsünüz və dəstəyinizlə çox böyük infrastruktur layihələrinə rəvac
verilmişdir. Qeyd etdiyiniz kimi, Sahil qəsəbəsində regionun ən böyük
gəmiqayırma zavodu və Ələt qəsəbəsində dəniz limanının təməli
qoyulmuşdur. Qaradağ rayonunun inkişafında Heydər Əliyev Fondunun
prezidenti, əzizimiz Mehriban xanım Əliyevanın da çox böyük zəhməti
vardır. Rayonun ucqar qəsəbələrindən olan Çeyldağ və Ələtdə yeni orta
məktəb binaları inşa olunmuş və balalarımızın istifadəsinə verilmişdir.
Möhtərəm Cənab Prezident!
Bu gün çox rəmzi məna daşıyır. Tanrının məsləhəti və taleyin qisməti
ilə Siz yenə Qaradağ rayonunda obyektlərin açılışında şəxsən iştirak
edirsiniz və bununla bizə çox böyük şərəf, sevinc yaşadırsınız. Bu
diqqət və qayğıya görə Sizə bütün qaradağlılar adından səmimi qəlbdən
təşəkkür edirəm. Əmin olun ki, qaradağlılar hər zaman sizinlədir və
Sizin bütün işlərinizi dəstəkləyirlər. Sizə və ailənizə möhkəm
cansağlığı, uzun ömür, Azərbaycanımızın gələcəyi, dövlətimizin inkişafı
naminə böyük uğurlar arzulayıram. Tanrı Sizi və Mehriban xanımı bizim
millətimiz üçün qorusun. Çox sağ olun.
Prezident İlham Əliyev: Çox sağ olun, xoş sözlərinizə görə təşəkkür
edirəm. Mən doğrudan da 1995-ci ildən 2000-ci ilə qədər çalışırdım ki,
imkan daxilində rayonun problemlərini həll edim. O vaxt burada dediyiniz
Fondun xətti ilə yaşayış binası da tikilmişdi, "Ümid” qəsəbəsi
salınmışdı. Əlbəttə, o vaxt imkanlarımız o qədər də geniş deyildi. Amma
bu gün Azərbaycan dünya miqyasında ən sürətlə inkişaf edən ölkədir.
Əlbəttə, ölkəmizin maddi imkanları da çox artıbdır. Biz çalışırıq və
nail oluruq ki, bu böyük sərvəti ölkəmizin inkişafına, insanların rifah
halının yaxşılaşmasına yönəldək. Təsadüfi deyil ki, keçən il dünyada
hələ də maliyyə və iqtisadi böhran hökm sürürdü, Avropa qitəsində
ölkələrin böyük əksəriyyətində maddi sıxıntılar ucbatından maaşlar,
pensiyalar kəsilirdi və bilirsiniz ki, bu çox böyük etirazlara səbəb
olurdu. Buna baxmayaraq, keçən il Azərbaycanda minimum əməkhaqqı,
pensiyanın baza hissəsi artmışdır, investisiya layihələri icra
edilmişdir, sosial məsələlər həll olunmuşdur, 70-dən yuxarı məktəb,
40-dan artıq xəstəxana tikilmiş və təmir edilmişdir, olimpiya
kompleksləri, belə gözəl parklar, xiyabanlar, yollar salınmışdır.
Bəli, Azərbaycanın uğurlu inkişafı artıq reallıqdır və təbii ki,
iqtisadi imkanlarımız artdıqca biz daha da böyük işlər görməyə qadir
olacağıq.
Keçən il böyük infrastruktur layihələrinin arasında Qaradağ rayonunda
görülən işlər də xüsusi yer tutur. Dairəvi yolun tikintisi nəinki Bakı
sakinlərinə, bütün ölkə vətəndaşlarına rahatlıq yaradacaqdır. İndi bu
yoldan bütün istiqamətlərdən gələn avtomaşınlar istifadə edir. Gələcək
planlarımız da çox böyükdür. Bu gün görülən işlər sadəcə olaraq gözəl
bir başlanğıcdır. Baxmayaraq ki, böyük işlər görülübdür, gələcək
planlarımız daha da böyükdür. Biz elə etməliyik ki, Azərbaycan dünya
miqyasında inkişaf etmiş ölkələrin sırasına daxil olunsun. Bunu etmək
üçün bizdə çox ciddi proqram hazırlanır. Elə etməliyik ki, iqtisadi və
sosial məsələlərin həlli işində bizdə bütün meyarlar ən yüksək səviyyədə
olsun. Biz buna nail olacağıq. Ölkəmizin çox gözəl bu günü və gələcəyi
vardır.
Bu gün - Heydər Əliyev Mərkəzinin açılışı günündə bu barədə söhbət
aparmaq yerinə düşür. Çünki bütün uğurlarımızın təməlində ulu öndərin
fəaliyyəti dayanır. Əgər 1993-cü ildə Azərbaycan xalqı Heydər Əliyevi
hakimiyyətə dəvət etməsəydi, ölkənin inkişafı tam başqa istiqamətdə gedə
bilərdi. Biz o günləri, 1991-ci, 1992-ci, 1993-cü illəri, vətəndaş
müharibəsini, iqtisadi böhranı yaxşı xatırlayırıq. Hamımız yaxşı
xatırlayırıq ki, şəhərlərimiz, rayonlarımız hansı vəziyyətdə idi. Bu gün
Azərbaycanın uğurlu inkişafı məhz o illərdə şərtləndirildi. Bizim
vəzifəmiz ondan ibarətdir ki, bu siyasəti davam etdirək, ölkəmizi
inkişaf etdirək, qabağa aparaq və həmişə iqtisadi, sosial məsələlərin
həlli işində dünya miqyasında birincilər sırasında olaq. Bu işlərdə sizə
və bütün Azərbaycan xalqına yeni uğurlar arzulayıram.
Qəsəbə sakinləri Prezident İlham Əliyev ilə xatirə şəkli çəkdirdilər.
Sonra dövlət başçısı burada orijinal üslubda inşa edilmiş Heydər Əliyev
Mərkəzinin rəmzi açılışını bildirən lenti kəsdi və bina ilə yaxından
tanış oldu.
Vurğulandı ki, burada ulu öndər Heydər Əliyevin zəngin irsinin
öyrənilməsi və təbliği üçün hər cür şərait yaradılmışdır, müasir
avadanlıqla təchiz olunmuş internet zalı fəaliyyət göstərir.
Prezident İlham Əliyev mərkəzin foyesində ulu öndər Heydər Əliyevin həyat və fəaliyyətini əks etdirən fotolara baxdı.
Bildirildi ki, Heydər Əliyev Mərkəzində nümayiş olunan bu fotolar
ümummilli liderin Qaradağ rayonuna səfərlərini, böyük sənaye
obyektlərinin açılışında iştirakını əks etdirməklə yanaşı, rayonun
inkişafının hər zaman ulu öndərin diqqət mərkəzində olduğunu bir daha
sübut edir. Azərbaycan müstəqilliyini bərpa etdikdən sonra da ölkəmizin
iqtisadi qüdrətinin artmasında Qaradağ rayonu mühüm yer tutur.
Qeyd edildi ki, Lökbatanda Heydər Əliyev Mərkəzinin yaradılması müasir
Azərbaycan tarixinin, Heydər Əliyev irsinin, ulu öndərin zəngin siyasi
fəaliyyətinin öyrənilməsi və təbliği baxımından böyük önəm daşıyır. Gənc
nəslin milli mənəvi ruhda tərbiyə edilməsində də ulu öndərin
fikirlərinin əvəzsiz rolu vardır. Yeni mərkəz Azərbaycan xalqının
ümummilli lideri Heydər Əliyevin dövlətçilik fəlsəfəsi və
azərbaycançılıq məfkurəsinin dərindən öyrənilməsi, geniş təbliğ olunması
baxımından da mühüm əhəmiyyətə malikdir.
Diqqətə çatdırıldı ki, mərkəzdə ümummilli liderin həyatından bəhs edən
nəşrlərin toplandığı kitabxana, kiçik kafeteriya fəaliyyət göstərir.
Burada 50 yerlik konfrans və 220 yerlik iclas zalları vardır.
Dövlət başçısı iclas zalında yaradılan şəraitlə tanış oldu, ulu öndər
Heydər Əliyevin həyat və fəaliyyətindən bəhs edən 3D formatında
hazırlanan filmə baxdı.
Heydər Əliyev Mərkəzi ilə tanışlıqdan sonra dövlət başçısı xatirə kitabına ürək sözlərini yazdı.
Daha sonra Prezident İlham Əliyev Heydər Əliyev Fondunun təşəbbüsü ilə
qəsəbə ərazisində yeni salınmış "Cırtdan” uşaq əyləncə parkı ilə tanış
oldu.
Bildirildi ki, Lökbatan qəsəbəsində uşaqlar üçün salınan park xüsusi
zövqlə inşa edilmişdir. Ərazidə inşa edilmiş qapalı "Cırtdan” uşaq
kafesi müasir mebel dəstləri və avadanlıqla təchiz olunmuşdur.
Bildirildi ki, 10 min kvadratmetr ərazisi olan park xüsusi dizayn
əsasında qurulmuş, burada müxtəlif attraksionlar və əyləncəli qurğular
quraşdırılmışdır.
Vurğulandı ki, parkda uşaqların mənalı istirahətinin təşkili üçün geniş
imkanlar yaradılmışdır. Bu, uşaqlara göstərilən diqqət və qayğının
Azərbaycanda dövlət siyasətinin prioritet istiqamətlərindən biri
olduğunu təsdiq edir. Heydər Əliyev Fondunun prezidenti Mehriban xanım
Əliyevanın təşəbbüsü ilə həyata keçirilən çoxsaylı layihələr bu sahədə
xüsusi önəm daşıyır. Azərbaycanın birinci xanımı Mehriban Əliyevanın bu
nəcib missiyası uşaqların xoşbəxt gələcəyinin təmin olunmasına
yönəlmişdir. O, öz xeyirxah əməlləri ilə Azərbaycan uşaqlarının ən böyük
dostu və himayədarına çevrilmişdir.
Prezident İlham Əliyev görülmüş işlərdən razılığını bildirdi.
Azərbaycan Prezidenti İlham Əliyev Lökbatan qəsəbəsinin girişində yeni salınan dəmir yolu ötürücüsü ilə də tanış oldu.
Bildirildi ki, köhnə yolötürücü müasir tələblərə cavab vermirdi. Dövlət
başçısının tapşırığı ilə yeni yolötürücünün inşasına başlanılmış və
yüksək tələblərə cavab verən dəmir yolu ötürücüsünün tikintisi qısa vaxt
ərzində başa çatdırılmışdır. Burada müasir işıqlandırma sistemi
quraşdırılmışdır.
Prezident İlham Əliyev ətraf ərazilərdə abadlıq və yaşıllaşdırma
işlərinin həyata keçirilməsi ilə bağlı tövsiyə və tapşırıqlarını verdi. Buyurun Fotoşəkillərə baxın:
Fikrinizi bildirməyi unutmayın!
Foto: AzərTAc
|