Главная » 2013 » Декабрь » 30 » DYP-dən Şamaxı yolundakı dəhşətli qəza ilə bağlı ittihamlara cavab
18:16
DYP-dən Şamaxı yolundakı dəhşətli qəza ilə bağlı ittihamlara cavab
Ötən gecə bir qrup şəxs Bakı-Şamaxı yolunun Abşeron rayonu
ərazisində yolu bağlayaraq aksiya keçirib. Aksiya iştirakçıları Dövlət
Yol Polisinin Müşfiqabad qəsəbəsi ərazisindəki postuna toplaşaraq
nəqliyyatın hərəkətinə və postda xidmət aparan yol polisinin
fəaliyyətinə mane olmağa cəhd göstəriblər. Aksiya keçirən şəxslər
dekabrın 28-də Bakı-Şamaxı yolunun Qobustan rayonu ərazisində keçən
hissəsində baş verən dəhşətli qəzada ölənlərdən üçünün yaxınları olub.
Onların iddiasına görə, Nurlan Qasımovun idarə etdiyi avtomobili qəzadan
bir qədər əvvəl yol polisinin əməkdaşları saxlayıblar və mübahisə
yaranıb. Mübahisə zamanı Nurlan Qasımov avtomobilinə əyləşərək, ərazidən
uzaqlaşmağa çalışıb. Lakin yaxınları bildirirlər ki, yol polisi
əməkdaşları həmin maşını təqib ediblər və avtomobili sürətlə idarə edən
Nurlan Qasımov ağır qəza törədib.
Hadisə yerinə polis qüvvələri cəlb edilib. APA TV-nin xəbərinə
görə, Abşeron Rayon Polis İdarəsinin rəisi Namiq İsmayılov aksiya
iştirakçıları ilə danışıq aparıb və onlardan nəqliyyatın hərəkətinə mane
olmamağı xahiş edib. Namiq İsmayılov mərhum Nurlan Qasımovun anasına bu
gün səhər şikayətçilərin əlaqədar vəzifəli şəxslər tərəfindən qəbul
ediləcəyini bildirib.
Dekabrın 28-də Qobustan rayonu Cəngi qəsəbəsinin ərazisində Bakı
şəhər sakini Nurlan Qasımov və Ağsu rayon sakini İnqilab Hacıəliyevin
idarə etdikləri "VAZ-2107” markalı avtomobillər toqquşub. Nurlan
Qasımov və sərnişinləri - Bakı şəhər sakinləri Güloğlan Əliyev, Əfran
Bəndiyev hadisə yerində, digər avtomobilin sürücüsü İnqilab Hacıəliyev
və sərnişinləri - Ağsu rayon sakinləri Tutu Nuriyeva, Səməndər Xəlilov,
Valeh Mədətov və Gülşən Nuriyeva isə xəstəxanada dünyalarını dəyişiblər.
Faktla bağlı cinayət işi başlanıb, istintaq gedir.